Сёння ў сярэдняй школе нумар 47 горада Віцебска прайшла прэзентацыя кнігі «Сімвалы беларускай вечнасці: гісторыя сімвалаў беларускай дзяржаўнасці», якая выйшла ў выдавецтве «Беларусь»

  Сёння ў сярэдняй школе нумар 47 горада Віцебска прайшла прэзентацыя кнігі «Сімвалы беларускай вечнасці: гісторыя сімвалаў беларускай дзяржаўнасці», якая выйшла ў выдавецтве «Беларусь». Аўтарам кнігі з’яўляецца вядомы беларускі гісторык, доктар гістарычных навук, член-карэспандэнт Нацыянальнай акадэміі навук Беларусі, актыўны грамадска-палітычны дзеяч, дэпутат беларускага парламента – Нацыянальнага сходу Рэспублікі Беларусь Ігар Аляксандравіч Марзалюк.
     Кніга прысвечана актуальным пытанням беларускай гісторыі, якія цесна звязаны з нашай сучаснасцю. Фактычна выданне нарадзілася з аўтарскага тэлепраекта «Сімвалы беларускай вечнасці». Пры гэтым мінулае, пра якое разважае аўтар у кнізе, – гэта  актуальнае гістарычнае мінулае, гэта той шлях, праз які прайшла Беларусь у сваім развіцці да сучаснай дзяржавы. Гэта кніга – пра веліч беларускай гістарычнай традыцыі і дзяржаўнасці, пра нашы гістарычныя сімвалы і вытокі, пра нас, пра нашых продкаў. На падставе шырокіх гістарычных крыніц,  значная частка якіх друкуецца ўпершыню, аўтар гаворыць аб гістарычных традыцыях беларусаў, аб вытоках беларускай нацыі, якія ўвасоблены ў сучасным дзяржаўным ладзе краіны, аб тым, што такое патрыятызм для беларусаў, для якіх слова «Радзіма» не з’яўляецца пустым гукам, а мае высокі сэнс і гонар.